Къона ӏилманхой белгалбир вай мехка, российски ӏилман Денца дувзаденна
Российски ӏилман Денза дувзаденна, вай мехкара къона ӏилманхой белгалбеш кхетаче дӏайихьар Гӏалгӏай паччахьалкхен университете. «Цаӏ йола Росси» яхача парте моттигерча оагӏон хьалха латта Кхоартой Ибрахӏим вар ӏилманхошта грамоташ, совгӏаташ дӏаденнар. Къонача ӏилманхой оагӏув хьаллоацаш дӏахьош болх бар из.
«Доккха баркал оалаш белгалйир дешара балха проректор Лаьнанаькъан Светлана, физиках йолча кафедра кулгалхо, физико-математически ӏилмай кандидат Налганаькъан Мадина; иштта ӏилман болхлой, исторически факультета боккхагӏбола хьехархой Тебой Илез, Янданаькъан Аза. Къаьстта белгалбир университета ректора ӏалбаканаькъан Фатимай болх.
Университете къахьегарашта доккха баркал кхайкадир шоай декхараш дизза кхоачашдеш хиларах», - дийцар «Сердалога» университета зарбан болх лелабераша. Къонача ӏилманхоша белгалдир, юкъарлон оагӏоно иштта терко яр шоашта низ луш долга. Къонача ӏилманхоша цхьацца балхаш тӏа къахьегар лакхача маьхе да тахан вай мехка.
