Чарахьашта-зуламхошта бехк бир
ГIалгIайче чарахьал дара йола ха я хIанз латташ яр, цудухьа республикан Iалама тароний, экологе Министерствос лаьрххIа йола бокъонаш чарахьаша лораяра тIахьожам лоаттабу. Инспектораша каст-каста рейдаш ю, уж хьожаш ба мишта лораю бахархоша йолаш йола бокъонаш. АргIанара болх дIабихьар Тирка дукъ тIара хьал довзара – МагIалбик-Шахьара къилбаседа даькъ тIа. Из болх дIахьош инспекторашта гучаяьлар чарахьал деш йола тоаба, Россе Iалама Министерствон амарца чIоагIъяь йола бокъонаш цо телхаеш хилар.
«Из тIахьожама болх дIабихьача ларах, уж дезал бехктокхаме оттабеш йола административни протоколаш оттайир. Бокъонаш телхаеш бараш бехктокхаме оттабир РФ КоАП 8. 37 статьях («Чарахьал дара бокъонаш телхаяр»), царех хIаранена гIод техар. Цул совгIа, лаьрххIа бола хьалхадаккхара болх дIабихьар. Инспектораша царна йовзийтар цу даькъ тIа лорае еза бокъонаш, уж телхаеш хилча саг бехктокхаме оттавеш хилар а довзийтар, иштта царна хьалхадаьккхар бокъо луш дола каьхат хила дезилга», - аьлар «Сердало» газетага ГIалгIайчен Iалама Министерстве.
ТIахьожама кхетаченаш мехка дIахохьоргья еррига чарахьал дара йола ха чакхъяллалца. Из ца хилча даргдоацар да республикан чарахьал дара бокъонаш Iалашъяра.
