«Юртара культуран оагӏонцара болхло» яхача программан доакъашхой бовзийтар мехка
«Юртара культуран оагӏонцара болхло» яхача федеральни программага гӏолла дӏахьоча яхьий балхах дийцар, мехкарча культуран гӏулакхех йолча Министерстве. Республикан юрташка къахьега дӏагӏоргбола болхлой къоастабеш хилар комисси. Цу гӏулакха тӏагӏолла оттадаь ахча да царна. «Ворхӏ дехар дар чуденна хиннараш, 100% хьаллаьцар уж. РФ Паччахьалкхено № 317 йолаш баьча соцамах, Гӏалгӏай мехкарча Паччахьалкхено № 33 йолаш яьча чӏоагӏонах кхоллама кружокашка къахьегаш хиннача ворхӏ сага шоашта хьожадаь ахча хьаэцаргда. Юрташкарча культуран Цӏеношка къахьега раьза хиларах, оагӏув хьаллоацаргба цар.
Яхьашка котбаьннараш ба Гӏулой И. А.(Чамалхара культуран Цӏа), Дзейтанаькъан М.З., Йовлой Х.З.(Гӏажарий-Юртара культуран Цӏа), Хамхой А.З.(Галашкара культуран Цӏа), Амренаькъан Б.А.(Арштера культуран Цӏа), Ужахьанаькъан М.Л.(Эбарга-Юрт), Оздой Я.Ф. (Юкъера Ачалкхе).
Хӏара болхлочунна дала 1 миллион сом ахча хьожадаьд. Цу рузкъах дикка гӏо хургда юрташкарча культуран Цӏеной болх тоабе, боаггӏача боараме хьаоттабе къахьега раьза барашта», - дийцар «Сердалога» цу оагӏонцарча министерстве.
«Юртара культуран оагӏонцара болхло» яхача программаца оттадаьчох, шоаш балха эттача культуран Цӏеношка диззача пхе шера къахьега деза цар. Гаьна ядача юрташкарча культуран Цӏеной болх дикка тоабе лерхӏ цу юкъа. Цу программан керттера декхар болхлой тоъаш боацача юрташка из гӏулакх меттадоаладар. Миллион ахча луш, гаьна ядача юрташка къахьегара тӏаоз цу оагӏонцара говзанчаш.
