КСВО кулгалхочо, берий бокъонаш лораярах йолча викала цхьана болх дӏабахьа лерхӏ
12.08.2026 12:40
АНО «Гӏалгӏай мехкарча Даьхен лорабой дезалий Комитета», мехкарча берий бокъонех йолча викала цхьана, бувзам лоаттабеш, болх дӏабахьара чӏоагӏо оттайир. Цу гӏулакхех долча каьхата кӏалха кулг яздир моттигий кулгалхоша Эсамарзанаькъан ӏалаудина, Чахкенаькъан Заремас.
«Тӏема операце доакъашхой дезалашта терко лоаттаярах болча кердача балхаца къаьстта терко е лерхӏ берашта, цар хьашташ кхоачашдеш», - дийцар «Сердалога» Эсамарзанаькъан ӏалаудина. Иштта цхьана болх дӏахьош хиларо дикагӏа гучадоахаргда цу наьха вахарера кхоачамбоацараш, эггара хьалхарча оагӏонца теркалде дезараш.
Тахан Даьхен гӏулакха арабаьнна лелача бӏухой барайтта шерга кхачанза долча берий дог хьастар, могачох царна гӏо дар лоархӏамеча декхарех да.
