ГӏалгӀай мехка дика лоаттаду лорий сиха новкъостал
ГӏалгӀай мехка дика къахьег лорий сиха новкъостал лоаттаду болх дӀахьош, из дегӀабоалабеш, яхаш, дийцар «Сердало» газетага ГӏалгӀай Республикан зарбан болх лелабераша.
«Россе президента Путин Владимира, «Керда проекташ дӀахо дӀаяхьара Агентствон» АНО тӀахьожама кхела балхага ладувгӏаш дийцар, моттигашкарча вахара хьалий дикалах. Цу юкъе дар сиха лорий новкъостал нахага дӀакхоачаш хилийтар а.
ГӏалгӀайче, Мурмански областаца, Чукоткаца цхьатарра лакха толамаш гойташ я сихача лорий новкъостала балха даькъ тӀа», - аьлар республикан кулгалхочо Келаматанаькъан Махьмуд-Ӏаьлас.
Карарча хана ГӏалгӀайче цу тайпара сиха лорий новкъостал лоаттадеш я кхоъ моттиг: хатарий лораш; сихача новкъостала республикански центр; Шолжа, Магӏалбика станцеш. Дика кхеташ вӀашагӀбеллача балха даькъ тӀа, сиха новкъостал эшаш хилча, 20 минота дӀакхоач ерригача республике гӀолла.
2024 шера оагӀой бетта денз, болх беш я ЦаӀ йола ден-бус къахьегача сихача лорий новкъостала диспетчер. Укхаза болх беш я 24 лорий йиша, юкъеяьккхай автоматизированни балха оагӀув, дӀа-юха лелаш йола тоабаш ГЛОНАССага гӀолла къахьегаш я. Цу дерригане таро лу сиха, эшача дӀакхача. Автопарк еррига а кердача машинашца Ӏалашо яь я, цо ший аргӀагӏа таро лу унахошта дарбанче дӏакхачалехь, эшаш дола лорий новкъостал де.
Из доацаш а, ГӏалгӀайче бӀаьш бола нах Ӏомабу хьалхара лорий новкъостал де. Дӏадахача шера 750 саг цу тайпара Ӏомаве таро хилар, дӀабихьаб 16 говзанча хьехам. Ладувгӏарашта юкъе я; дешархой, хьехархой, хьехамчий, МЧС болхлой, ГИБДД, иштта лахара-кӀалхарбахара тоабаш. 2026-2028 шерашка кхы а 1500 вахархо Ӏомавергва.
Иштта кхеташ бола нах мел хул, дикагӀа таро я саг кӀалхарваккхара, лорий новкъостал дара.
«Сихача новкъостала гӀо – из кӏалхардаьккха сага вахар да. ЛоархӀаме да ГӏалгӀайчен вахархочунна сиха новкъостал дӀакхоачаш хилар. Тхо дӀахо техника чӀоагӀъеш да, юкъедоаладеш таьрахьий хаттараш, лорий балха говзал лакхъеш – из ба лорий балха мах, гӏулакх дегӀадоаладара боккхача балха чаккхе»,- аьлар Макшарипа Махьмуд-Ӏаьлас, цу даькъ тӀара декхараш дувцаш.
Цо дег чура даькъалабийцар ГӏалгӀайчен сихача новкъостала болхлой, цар хала а бехктокхаме а бола болх иштта дика къахьегаш дӀабахьарах.
