Республикан бюджете хьачудоагӏаш дола рузкъа дукхагӏа хилийтарах дийцар мехка
Вай мехкадас Келаматанаькъан Махьмуд-Ӏаьлас кхетаче дӏайихьар, СКФО ФНС мехкашта юкъерча инспекце кулгалхо волча Радченко Евгенеца, мехкарча УФСН хьалха латтача Сидельников Евгенеца.
«Кхетаче дийцар респбликанна хьатӏадоагӏаш дола рузкъа дукхагӏа хилийтарах, бизнесацара гӏулакхаш боаггӏача боараме тоадарах, йоалах болча оагӏон болхлоша, мехкарча Минфино вӏаши бувзам лоаттабарах, иштта къайлагӏа лелаеш йолча базарий, моттигий хӏама хила деззача тайпара тоадарах. Цул совгӏа, белгалдир муниципальни комиссе доакъашхоша цхьацца моттигашкара йоалацара болх тоабе безилга.
Вай Мехкадас цу кхетаче хьоахадир, моттигера хӏара бизнес дӏахьош йола моттиг ӏаьдала бокъоно дӏадеххача тайпара гӏулакх дӏахьош хила езилга, цу хӏаман къаьстта йоккха терко лоаттаеш хила безилга», - йоах Мехкадаь зарбан болх лелаберашкара тхога кхаьчача хоамо. Кхетаче дакъа лоацаш хиннараша соцам бир белгалдаь дола деррига гӏулакхаш боаггӏача боараме дӏадахьара тӏехьа дикка къахьега. Дӏакхухьача балхах хьахиннар хан-ханнахьа белгалдеш, къоастадеш хила деза, аьнна, лаьрхӏар хьакимаша.
«Вайна духхьала йоалаца дувзаденна гӏулакх хинна ӏац из. Тахан вай белгалдер да, бизнесацара болх боаггӏача боараме, бокъонца хила беззача тайпара дӏахьош хила безилга. Беррига бизнесменаш бокъонаш цхьатарра лораеш, совле йоацаш къахьегаш, хила беза мехка. Бизнесацара гӏулакхаш бехктокхаме, нийса дӏахьош дале, цу тӏехьа аьттув бараш а дукхагӏа хул, вахара оагӏонцара программаш йоаржае, наьха вахара хьал тоаде аьттув луш да из деррига», - аьлар вай мехкадас Келаматанаькъан Махьмуд-Ӏаьлас.
