Гӏалгӏай мехка дийцар СВО бӏухой лорашка чакхбалара дош
«Даьхен лорабой» ганза Гӏалгӏайчен филиале дӏахьош хиннача боахамашта юкъерча кхетачене дийцар тӏема ветеранашта лорий гӏо дара хьал тоадарах. Цу къамаьла юкъе дакъа лоацаш хилар филиала кулгалхой, республикан унахцӏенон Министерствон викалаш, иштта шахьарий, кхалений лорий урхалленаш, республикан бӏухой могашал меттаоттаяра центраш.
«Цига дийца керттера дош дар, СВО доакъашхой лорашка чакхбалар, цар могашал меттаоттаяр, из новкъостал лакха дикал йолаш хилийтар, цу юкъе лакхача технологей меттаоттабара хьалаш а долаш. Совещани дӏахьош СВО доакъашхошта диспансеризаци яра лаьрххӏа йола план оттайир, из лоаццача ханашка дӏаяхьа лерхӏ, ше-ший аргӏагӏа бӏухой лорашка чакх бахара хьалаш вӏашагӏ а дохкаш. Иштта цига дийцар бӏухой салаӏара хьал вӏашагӏдолларах, уж санаторешка ахийтарах, иштта ден-бус болх беш йолча дарбан урхалленашка, шоаш болча моттигерча терапевтически даькъ тӏара лорий гӏулакх царна лоаттадарах», - аьлар «Сердало» газетага «Даьхен лорабой» ганзе.
Цига вӏашагӏбеллар, республикански, федеральни могашал тоаеча моттигашка дарба де уж сиха дӏахьожабергбола болх. Лораш болх дӏахьош ба бӏухой бахаш болча моттигашка болхаш, цар хьал тохкаш, уж хул Гӏалгӏайчен массайолча уж бахача юрташка.
Ганза моттигерча отделене кулгалхочо Абаьданаькъан Ислама белгалдир, бӏухошта дарба дара хаттарашта юкъе каьхаташца беш бола болх лаьгӏбе беза. Цо белгалдир, тӏем тӏара цӏабаьхкача бӏухой, уж бахача моттиге терко е еза ма хулла чӏоагӏа. Иштта цо баркал аьлар республикан унахцӏенон Министерствонна, цо шоашца дика бувзам лелабарах, уж бӏухошта новкъостал де массайолча хана кийча хиларах.
