Мехкарча кхерамзлен хьалаца дувзаденнарех дувцаш, кхетаче хилар республике
Мехкарча кхерамзлен хьалаца, бокъонаш лораярца, къаман проекташка гӏолла болх дӏабахьарца дувзаденнараш белгалдеш, кхетаче дӏайихьар республикан кулгалхочо Келаматанаькъан Махьмуд-ӏаьлас. «Сердалога» из хоам бера мехкарча Паччахьалкхера.
Къаьстта терко еш дийцар кхетаче бокъо йоацача тайпара лаьттан доазош дӏалувцарах, цхьаккха чӏоагӏо йоацаш гӏишлон балхаш дӏакхахьарах, муниципальни оагӏонцара тӏахьожам, терко боаггӏача боараме цахиларах. Муниципалитетий кулгалхошта хьалхадаьккхар Мехкадас, бокъонаш лораяр цар балхацара лоархӏаме декхар долга, моллагӏа хӏама хоаттам болаш хургдолга.
Укх шерарча ялх бетта дӏабихьача балхах лаьттан доазошцара 68 миллион сомага кхоачаш зе деш бола 23 тийшаболх гучабаьлар мехка. Келаматанаькъан Махьмуд-Ӏаьлас тӏадиллар, хӏара гӏулакха ларах тохкама болх дӏабихье, хинна зе меттаоттаде, бехкебараш боаггӏача боараме бехктокхаме оза, аьнна. Муниципалитеташта тӏадиллар ӏаьдала болхлошца бувзам лоаттабеш, цу оагӏонцара болх лертӏача оагӏорахьа баккха, аьнна. Цул совгӏа, «боахама книжкаш» лорадара тӏехьа юкъара архив хьае, деррига каьхаташ таьрахьашцарча оагӏон тӏа дӏатӏадаха, аьнна.
Иштта йоккха терко еш дийцар кхетаче наькъашкарча хатарех. Укх тӏехьарча ворхӏ бетта хинна хатараш сатем боабеш да, ала йиш я. 131 хатар нийсденнад вай наькъашка, цу юкъе 30 сага вахар хаьдад, 180 саг лозаваьв.
Мехкадас тӏадиллар наькъашкара тӏахьожам дикка чӏоагӏбе, кхераме лоархӏаш йолча моттигашта къаьстта терко еш хила, аьнна. Болх дӏабахьара тӏахьожача кхела кхетаче дийцар хоржамий болх боаггӏача боараме, цхьаккха кхоачамбоацар доацаш, лерттӏа кийчо яь дӏабахьа безилгах, къаман проекташ йоаржаярах. Хӏара оагӏонца кхоачашде дезараш белгалдир вай Мехкадас.
