ГӏалгӀай мехка хьежар, цӏи яларга а из йоаярга а кийча миштаб
ГӏалгӀай Паччахьалкхен вице-премьера Антонов Игора кулгал а деш, чоалхане хьал юхатохара йолча кхела гуллам хилар, яхаш, хоам бу «Сердало» газетага республикан министрий кабинета зарбан болх лелабераша.
Керттера дийца дош дар 2026 шера цӀи ялара кхерам бола ха тӀаярга малагӀа кийчо яьй, иштта РСЧС доазон тӀа малагӀа хьалаш да цу гӀулакха лаьрхӀа; цул совгӏа, догӀаш делхарах ӏаьржа хий доагӏа бӀаьстан ха наха зе доацаш дӏаеразаярга даьр фуд хьежар.
«Хьу я 27% ГӏалгӀайчен даькъ тӀа – из 84 эзар совгӀа гектар я. Цудухьа из хьу лораяр вай эггара лоархӀамегӀа дола декхар да.
Дӏадахача шера таро хилар хьунашка цӀи ялара хьал лораде, зе доацаш из чакхдаккха. ЛоархӀаме да массайолча балха моттигаша, 2026 шера цӀи ялара кхераме йола ха хьатӀайоагӀаш, дикка кийчо яр», - аьлар Антонов Игора. Хьу лораяра цига дӀабахьа беза болх хьалххе а кийчо яь хилар ца хилча даргдоацар да.
Укхаза иштта терко тӀаяхийтар доккхий догӀаш делхарах хиш айлуча хана де дезарашта. Из я, говзанчаша яхачох, маьтсела беттагара аьтинга беттага кхаччалца йола ха. Цунца дувзаденна хицарча гӀирсашка, иштта кхыча дешашка хьожаргба болхлой.
Боахамашта тӀадиллад, хьалххе а кийчон балхаш дӀадахьар.
