ГӏалгӀай мехка чӀоагӀвир, ТКО даькъ тӀа цаӀ вола оператор
ГӏалгӀайчен Ӏалама тароний, экологе министерствос, «Эко лайф» компане бартчӀоагӀам беш кулг яздир бувзам лелабара коммунальни чӀоагӀа нувхаш дӀакхахьара даькъ тӀа. ЧӏоагӀо лелаергья ворхӀ шера, цо болх бергба республикан доазон тӀара чӀоагӀа нувхаш дӀакхухьаш а, уж чакхйоахаш.
«Эко лайф» ООО цаӀ вола оператор ва, бокъо йолаш, ерригача республикан даькъ тӀара ТКО дӀаяхьара чӀоагӀо е. Лелаеш йолча бокъонах да ТКО хьалаш лоаттадара республикерча операторца чӀоагӀо яр. Уж ба вахара а, вахара йоацача а моттигий дай, урхаллен компанеш, ТСЖ, иштта организацеш, доалахьара хӀама леладу нах.
«Эко лайфаца» чӀоагӀо цаярах, е кхывола подрядчик харжарах административни бехктокхаме оттаву. Бюджета организацешта, цу тайпара хьал леладеш хилча, ахчанцара таронаш нийса ца лелаеш лоархӀ, цох къаьстта бехктокхаме а оттаву», - аьлар «Сердало» газетага ГӏалгӀайчен Ӏалама министерстве.
«Эко лайф» ООО, иштта мехка Ӏалама Министерствон юкъе чӀоагӀо хилар, республикера ТКО хьал леладара даькъ тӀа лоархӀаме гӀа ба.
