«Дикагӏа йола ишкола столови» яхача яхье котбаьннараш белгалбир
Гӏалгӏайчен Магӏалбика кхален Инаркъера ишкол дакъа лоацаш хилар «Дикагӏа йола ишкола столови-2026» яхача яхье. Керттера яхьаш дӏайихьар моттигерча №11 йолча юкъерча ишколе. Хьалхагӏа, доал дара даькъ тӏа шоаш дикагӏъярех хилар чӏоагӏдаь мехкара дешара моттигаш яр цу юкъе дакъа лоацаш.
Гӏалгӏайчен дешара, ӏилман Министерстве «Сердало» газетага ма аллара, из дӏайолалуш кхоллама программа гойтар. Из дӏахьош хиннача ишкола дешархоша хаьшашта, доакъашхошта лаьрхӏа, культуран Цӏен артисташца цхьана, безаме тӏаэцар кийчдир, лаьрххӏа йола программаш юкъеяьха.
Цул тӏехьагӏа кхелахоша шоай болх дӏаболабир.
Дешара моттигашка кийчдаьча даарашта мах оттабеш яр кхел. Цар теркалдир ишкола балха хӏара дакъа, санитарно-эпидемиологически хьалагара даарех дӏатехача чам тоабеш болча кхоачамга кхаччалца.
Дукха шоайла дагабаьнначул тӏехьагӏа, республикан дикагӏа йола кхо ишкола белгалйир. Сийлен хьалхара моттиг яьккхар Магаса №2 йолча юкъерча ишколо, шоллагӏча моттиге хилар Шолжера №8 йола юкъера ишкол, кхоалагӏа моттиг яьккхар Долакха-Юртарча №6 йолча ишколо-берий бешо.
«Дикагӏа йола ишкола столови» яха яхь - из я кхача кичбара говзал гойташ. Бакъда цул совгӏа, цо хьагойт берий могашала эшар, дешара керда кеп. Цун керттера декхар - дешархой кхачан кхерамзле, цун дикал лакхъяр, иштта шоаш йол-йолча цу моттигаша болх дикагӏа тоабар.
