Даьхенцара безам чӏоагӏбарах йола «Ноахал 18-35» яха кхетаче дӏахьоргья гурахьа
Укх шерарча гуйран бетта «Ноахал 18-35» яха Даьхенцарча лерхӏамах йола кхетаче дӏаяхьа лерхӏ вай мехка. «Мужече» яхача спорта кийчон моттиге кхаь дийнахьа дӏахьош хургья из. Боккхача мехкара 200 совгӏа бола хьинардараш, тӏема моттигий ветеранаш, СВО доакъашхой гуллургба цига. Иштта кхетаче дакъа лоацаш хургба гӏо деш лелараш, хьакимаш.
«Къаьстта терко ергья цига «Турпала никъ» яхача моттигерча яхьашка, «Турпала ха» яхача федеральни яхьашка хьалхабаьннарашта. Тахан геттара лоархӏаме да къонабараш тӏема гӏулакх довзачарца къамаьл доагӏаш, бувзам лелабеш, цар вахаре нийсденна тӏема истореш довзаш, Даьхен хӏама лорадар яхача деша тӏехьа малагӏа гӏулакхаш латта деза ховш хилар.
РФ Президента Путин Владимира цу оагӏонца чӏоагӏдаь декхараш теркалдеш, болх дӏахьоргба кхетаче. Цу юкъе да къонабарий дегашка Даьхенцара безам чӏоагӏбар, мехка пайдане, цох дог лазаш хилар. Къаьстта терко ю Президента гӏо дечар гӏулакх доаржадара, Даьхенцарча лерхӏамах йолча юкъарлон оагӏонцарча моттигашка дакъа лоацаш хилара», - язду вай мехкадас Келаматанаькъан Махьмуд-ӏаьлас ший Телеграм-канале.
Республикан кулгалхочо белгалдечох, кхетачен программа гӏо дарах, Даьхен хӏама хьаллацарах долча оагӏонех латташ хургья дукхагӏча даькъе. Кхаь дийнахьа хургйолча кхетачен юкъе да СВО ветеранашцара, паччахьалкхен моттигий доакъашхошцара вӏашагӏкхетарш, иштта кхыдараш.
Хьинардараш ӏомалургба лозабаьрашта хьалхара лорий гӏо де, новкъостала йохьийташ йола хӏамаш гулъяра болх мишта дӏабахьа беза; СВО доакъашхой, цар дезалий оагӏув хьаллацарах йола волонтерски проекташ йоаржаеш кхоачашде дезараш довзийтаргда царна. Къаьстта терко ергья мехкашта юкъерча балха. Вай мехкадас теркалдир, хӏара моттиге из болх ший тайпара дӏахьолга, пайданедараш дӏа-хьа эцаш хила дезилга.
еспубликан кулгалхочо белгалдир, къонача тӏехьенцара Даьхенцарча лерхӏамах бола болх тахан латташ дола гӏулакхаш теркалдеш хила безилга. Мехка истори довзарах, Даьхе еза сона, яхаш, къамаьл дарах латташ дац из. Эшача моттиге гӏо де сиха хиларо, Даьхе лораечар оагӏув хьаллоацаш, гонахьарча наха пайдане хиларо хьахьокх сагá бокъонца ший Даьхе езилга.
Кхетачен хьалхаэттараш я кагирхой гӏулакхех йола мехкара Комитет, «Даьхен лорабой» яхача ганза республикера филиал. Цар шоашта хьалхашка оттадаь керттера декхар – цхьан доазон тӏа кагирхой политиках болча оагӏон болхлой, ветеранаш, СВО доакъашхой, гӏо лоаттадеча моттигашта хьалхалаттараш гулбар, царна массане декхараш довзийтар.
