Наркотикашца базар яьча Владимирски областерча вахархочоа суд йир
Наркотикашца базар лелаяьча Владимирски областерча вахархочунна 7,5 шу набахта валла ха техар вай мехка. Из хоам «Сердалога» бир МВД.
«Шолжа кхалерча суде дийцар 39 шу даьннача Владимирски областерча вахархочун дош. РФ УК 1-ча даькъа 228 ст. бехктокхаме озаш ва из (бокъо йоацаш наркотикаш лелаяр), иштта 3-ча даькъа 30-ча ст. п. «г», 4-ча даькъа 228 ст.( Интернете гӏолла цхьан тоабан доакъашхошца вӏашагӏделла наркотикаш йохка гӏортар)», - йоах тхога бенача хоамо.
Судо белгалдечох, 2024-ча шерарча гуйран бетта интернете гӏолла цхьан сагаца вӏашагӏделла Гӏалгӏай мехка къайленашка гӏолла наркотикаш йохка лаьрхӏа хиннав из. Ковров яхача шахьарера эфедрон ийца, банка чу елла, вай мехка хьаенай цо. Бакъда, ший бӏеха гӏулакх чакхдаккха аьттув баьннабац цун, дохка лаьрхӏа хинна «дохьаж» дӏадоаккхаш, полице болхлоша хьалаьцав из.
Иштта шийна аьнна цо ийца 0,24 грамм метилэфедрон дӏаяьккхар ӏаьдала болхлоша.
Цу сага кхоабаш ши бер хилар теркаме лоацаш, 7 шуи ялх бутти ха техар цунна, набахта такха езаш.
