Гӏалгӏайче дагалаьцар цӏихеза йоазонхо Чахкенаькъан Саӏид
1938 шера наджгоанцхой бетта 22-ча дийнахьа ваьв цӏихеза йоазонхо Чахкенаькъан Саӏид, цун кхоллам къаман тӏехьален дакъа хинна дӏаэттаб, хӏаьта цун цӏи - гӏалгӏай къаман белгало. Йоазонхочун сий деш, Йоккхача Ачалкхен культуран Цӏагӏа «Дукхача оагӏорахьара начӏал» яха герга истол дӏадихьар. Кхетаче чуйоагӏаш яр «Дешархошта лаьрхӏа культура» яхача культуран-дешара проекта.
«Чахкенаькъан С. И. Российски боарама йоазонхо ва. Цун беррига кхоллам бувзабенна ба Россеца, гӏалгӏай къаманца, цун дукхача къамех латтача халкъаца, цунца ба йоазонхочун низ а. Тхоай герга истол дӏахьош, оаха дийцар дешархошта Идриса Саӏида вахарах, кхолламах. Бераша йийшар цун байташ, иштта уж хьежар «Маькха гӏоргӏилгаш» яхача видеороликага. Йоазонхочун книжкай гойтам а кийчбаьбар», - аьлар «Сердало» газетага из кхетаче вӏашагӏъеллараша.
Чахкенаькъан Саӏид исторен оагӏонашка ва боккъонца вола халкъа йоазонхо санна, из ва иштта прозан, драматически кхоллама автор, поэт, публицист, таржамхо, юкъарлон болхло. Цун книжкаша хьагойт кӏоаргга къаман оамалаш, ӏадаташ, уж кхоачийт къонача тӏехьенга. Чахкенаькъан Саӏида кхоллам бизза ба ший Даьхенцарча безамах, хӏара дешо хьагойт цун мехкацара, ший къаманцара, хьамсарча лаьттанцара безам боккха хилар.
Идриса Саӏида литературни тӏехьале- из хьаькъала хьаст ба. Цун кхолламо вайца къамаьл ду, цо вай ӏомаду хозагӏдар го, воай овлаш тешшаме леладе, дикача гӏулакхий низах теша.
