Гӏалгӏай мехка болх беш ба «Дийнача исторе са» яха гойтам
Гӏалгӏайчен къам мехкахдаккхара дагалоаттама Мемориала музее болх беш ба «Дийнача исторе са» яха гойтам. Из хетабаьб халкъашта юкъерча сийленгий, дагалоаттама моттигий денна. Цо таро лу республикера историко-культуран тӏехьале кӏоаргга йовза. Видеосурташка гӏолла гуш да Гӏалгӏайчен юкъерча бӏаьшерий гӏалай, элгаций, сийлен лоамий куц-сибаташ, уж да къаман мотт хьалебеш доаца тешаш.
«Гойтаме дувц къаьнарча гӏалай тамашийнача дуненах, веза Даьла хьехавеш хиннача моттигех, цу хана баьхача наьха вахарах, ӏалама хозалах. Къаьстта йола терко тӏайохийт культуран тӏехьале лораяра, иштта юкъарча дагалоаттама сийленгаш лорадара.
«Дийнача исторе са» - из таро я сага шийна хьалхашка юха керда исторен кӏоаргал, таханарча заман искусства кеп хьаеллара», - аьлар «Сердало» газетага гойтам вӏашагӏбеллараша.
Гӏалгӏайчен кхерах даь хӏара сийленг - из цхьан моттиге латтийса дӏаяхача заман ха я, из тахан а вай вахаре йолаш я.
Гойтамо таро лу дӏаяхача заманцара бувзам, хоада ца беш, архитектура гӏирсашка, гӏишлоний тамашийнача моттигашка, культуран тӏехьаленга гӏолла лелабе, иштта лоархӏаме сийленг лораде, из вайга кхоачаш кхерага, кепага гӏолла.
