Хи чу ваха кӏаьнк лехарашта бӏохбала моттиг кийчъяьй
Хила ваха кӏаьнк лаха оарцагӏбаьннача наха бӏохбала, хӏама кхалла моттиг кийчъяьй Илдарха-Гӏала, Яндаре вӏашагӏкхетача.
«Укх деношка доккха хатар хиннад Илдарха-Гӏалий тӏа. Хила ваха Дербичанаькъан Хизар лохаш ба вай мехкара, нохчашкахьара, селашкахьара денз гулбенна нах. Бархӏ шу даьнна кӏаьнк коравоагӏаш вац; бакъда бера дас, нанас, иштта из лаха арабаьннараша чӏоагӏа сатувс из хьакораварга. МЧС болхлошта, гӏо де арабаьннарашта, Шолжа юхе болх дӏахьош мел барашта бӏохбала, хӏама кхалла аьттув хургболаш, хьайийллай из моттиг», - дийцар шахьара администраце.
Мехкарча дуккхача наха дакъа лоацаш, болх ба тахан дӏахьор. Магасерча администраце 10 болхло вахийтав цига гӏо де, эшаш дола мушаш, лампаш ийцай. Наьсарерча хьакимаша гӏо дечарна эш аьнна хета хӏамаш, иштта чай, баа кхача бахьийтаб.
