Гӏалгӏайче хьайийллар ворхӏ юртара кабинеташ
Гӏалгӏайчен ворхӏ юрта хьакхеллар шоаш бахача моттиге паччахьалкхен, ахчан онлайн таронаш лелаяра йола моттигаш, яхаш, дийцар «Сердало» газетага мехка Минпромбувзаме.
Керда таьрахьий моттигаш я Магӏалбика кхален Махьмад-Хи тӏа, Вежарий-Юрта, Шолжа кхален Даьттагӏе, Оалкама, Чамалха, Берда-Юрта, иштта Жӏайрахьа кхален Хьуле.
Юрта администрацешка пхиъ кабинет кийчъяьй, кхы шиъ хьайийллар культуран Цӏеношка.
Хӏара балха моттиг накъайоалаш я 43 таьрахьий таронашка кхачара. Хьалххе а компьютерашта тӏалотадаьд интернет-хьалаш довзийташ дола каьхат, цо таро лу бахархошта шоашта дезар сиха хьалаха.
Юртарча кабинеташка гӏолла Госуслугаш, МФЦ цаӏ йола портал, Федеральни йоала служба, Россе банка хьалаш леладе йиш я, иштта йиш я кхыча банкий, ахчан моттигий сайташ лелае.
Цул совгӏа, наьха таро я цига гӏолла балха моттиг лаха, юридически новкъостал деха, ахчан хьалаш дикагӏа довза.
Цу тайпара хьалаш хьакхоллар лоархӏаме да къаьстта гаьна ядача юрташка бахача, таьрахьий технологеш дӏа ца кхоачаш болча наха. Кердача майдаша таро лу эшаш дола электронни хьалаш лоаттаде, шоаш бахачара гаьна ца болхаш уж леладе.
Дӏахойодача хана республике кабинеташ дукхагӏа хургья. Проект кхоачашъеш я Россе Банка хьалхадаьккха, Гӏалгӏайчен Паччахьалкхено, доал деча доакъоша, Гӏалгӏай Республикан промышленноста, таьрахьашца дегӏаахара Министервос цхьана хьаллоацаш.
