Республика хьакхелла 34 шу дизар дездир мехка
Республика хьакхелла 34 шу дизара хетаяь кхетаченаш хилар вай мехка. Магаса керттерча майдан тӏа эттача цӏайна юкъе дакъа лоацаш хилар эзараш мехкахой, арахьара тӏабаьхка хьаьший. 34 шера Гӏалгӏай мехка дукха хӏама хувцаденнилга, вахара-экономически хьалаца доккхий толамаш хиннилга гуш да вай дерригаш. Дешара, спорта, унахцӏенон оагӏонцара дукха гӏишлош хьалъяьй республике цу юкъа, тоадаьд дукха наькъаш. Вай мехкадас Келаматанаькъан Махьмуд-Ӏаьлас белгалдир, уж деррига толамаш боккхача мехка кулгалхоша гӏо деш, бахархоша къахьегаш вайга кхаьчалга.
«Дукха хӏама да 34 шера мехка кхоачашдаьр. Тахан экономикан хьал тоадеш, йоккхий, лоархӏаме проекташ йоаржаеш къахьегаш да вай. Из деррига кхоачашдеш да бахархоша хьинаре къахьегаш, Россе Президента Путин Владимира вай оагӏув хьаллоацаш», - белгалдир Мехкадас.
Республикан кулгалхочо хьоахадир, къона тӏехье ший даьй ӏадаташ, беркате гӏулакхаш лоархӏаш, довзаш кхеяр керттерча декхарех долга, иштта мехка хӏама хӏара денна дикагӏа тоалуш хургдолаш къахьега дезилга. Россе тайп-тайпарча моттигашкара артисташ, кхоллама тоабаш гулъенна цӏай дар Магасе лаьттар. Иразе, беркат, аьттув, дегагӏоз йолаш баха, къахьега даькъалабийцар вай Мехкадас бахархой.
