ИТ - оагӏонца бувзам лелабе ловраш дукха ба вай мехка
Ши шу дузаргда укх шера, таьрахьашца дувзаденнарех йола Академи хьакхелла. Вай мехка санна ерригача Къилбаседа Кавказа а лоархӏаме оагӏув хилар цох. «Сердалога» из хоам Мехкадаь зарбан болх лелабераша бир.
«Тахан Академе хотташ я Сберагара кампус «Ишкол 21», «Гӏалгӏайчера Бизнес-акселератор», «Балхаца дувзаденнараш тоадарах йола моттиг», «Роболаба» яха робототехникай лаборатори. 2024-ча шера денз, укхаза дешар чакхдаьккхараш 9000 эзар совгӏа нах ба.
«Ишкол 21» яхача программо, вай мехкара доакъашхой санна, мехка кхыйолча регионашкара адам а чуэзад. 20% дешаш бараш СКФО субъекташкара, Москвера, Московски областера, Санкт-Петербургера, Краснодарера, Ямало- Ненецки автономни моттигера, Алтаера, иштта кхыйолча моттигашкара нах ба», - белгалдир вай мехкадас Келаматанаькъан Махьмуд-ӏаьлас.
Цу наха мел эшар ӏалашдаьд мехка. Цу оагӏонцарча Smart-отеле мах боацаш баха йиш йолаш ба уж. Дӏадахача шера 105 саг вар цига ӏеш. Карарча хана кампусе дешаш бараш 500 саг ва. ИТ оагӏонца дувзаденнараш хьалхара довзаш ба царна юкъера дукхагӏбараш.
«Таьрахьашца дувзаденнарех йола Академи лоархӏаме моттиг хинна дӏаэттай мехка тахан. Доккха баркал кхайкаду Гуцаранаькъан Микаила из проект йоаржае гӏо дарах. ИТ - оагӏонца бувзам лелабе ловраш кӏезига боацилга теркалду вай тахан. Вай берий, къонача говзанчий, моттигера арабовла ца безаш, дуккхадараш шаьрде аьттув ба тахан.
«Ишкол 21» оагӏоно эггара хьалха арахийцараш тахан 40% -га кхоачаш балха тӏа дӏанийсбенна ба», - белгалдир вай мехкадас Келаматанаькъан Махьмуд-ӏаьлас Академе толамех дувцаш. Кӏимарса бетта 28-ча дийнахьа арахецаргба Магасе «Ишкол 21» яхача оагӏон дешархой. Керда дешара проекташ йоаржае лерхӏ цу оагӏонца. Царна юкъе хургья хьакхеллача хьаькъалцара, машинашцарча дешарах, таьрахьашцарча бизнесах, иштта кхыдолча оагӏонех йола проекташ.
