«Сурхотӏе - Алхасте» яха никъ тоабир вай мехка
Вахарера моттигаш тоаярах йолча къаман проектага гӏолла «Сурхотӏе-Алхасте» яха 12 километрага кхоачаш бола никъ тоабир мехка.
«Кӏалхара никъ хьалъийца, кӏийле дикка тоаяь, керда асфальта никъ ӏобиллар цига, иштта меттабоалабир гӏашлой никъ, наькъа гонахьара доазув а тоадир. Бахархошта лоархӏаме болаш, Наьсарен кхале, Шолжа кхале хотташ, лоаман юрташка болхараш дӏа-хьа ухаш никъ ба из. Цул совгӏа, ветераний Цӏен, кадетски корпуса тӏаболхараш а цу наькъ тӏагӏолла лел», - дийцар тха газетага мехкадаь зарбан болх лелабераша.
Республикан кулгалхочо белгалдечох, мехкарча наькъий хьал меттадоаладар эггара лоархӏамеча декхарех да тахан. «Цаӏ йолча Россе» Къаман программага гӏолла йоаржаеш йолча, вай Президента Путин Владимира чӏоагӏонца хьакхеллача къаман проектага гӏолла хӏара шера республикера наькъаш тоадеш боккха болх лоаттабу.
«Кхерамзлен хьал духхьала наькъаш дика хиларах лоралуш дац. Наькъаш мел дика тоадаь хиларах, саг наькъашкара бокъонаш лораеш веце, деррига цо толхаду. Цудухьа массанега кхайкарал ду аз, машинаца арадаьлча наькъашкара бокъонаш лоархӏаш хила, яхаш», - белгалдир Мехкадас. Укх шера болх дӏахьош 40 километрага кхоачаш болча ворхӏ наькъа хьал меттадоаладе лерхӏ мехка.
