Тӏунгой Хасана «Дошо седкъа» дӏабелар цун гаргарча нахага
Лоархӏаме кхетаче дӏаяхьа гулбелар Магасе. РФ герзашцарча низий Министерствон кулгалхочун гӏонча, эскара инарал волча Евкуранаькъан Ювназ-Бека, вай мехкадас Келаматанаькъан Махьмуд-Ӏаьлас Россе турпал волаш вахар хаьдача Тӏунгой Хьасана «Дошо седкъа» цун гаргарча нахага дӏабелар.
«Гӏалгӏай бӏухошта бенна пхелагӏа «Дошо седкъа» ба из. Тӏунгой Хьасан тӏема аренашка Даьхен хӏама лорадеш, шийна тӏадаьхка декхараш дизза кхоачашдеш, шийх дика цӏи йоаккхийташ лаьттав.
Вай Мехкадас белгалдир, подполковник цу дийнахьа бокъонца вола командир волга гойташ хиннилга - кхерама кӏалхара бӏухой хьаарабаьха, шоай машинаш, гӏирсаш толха ца дайта хьожаш, ший низ дӏакхоачар деш духьалъэттав»,- дийцар тхога Мехкадаь зарбан болх лелабераша.
«Тӏема аренашка латташ бола вай беррига бӏухой деналца, майралца белгала болаш, дика цӏи тӏехьа йолаш хьабаьхкаб. Шоай декхараш бехктокхаме дӏахьош, Даьхен хӏама лораде кийча болаш, духьале еш хьабаьхкаб уж. Аз кхетаду тахан, цхьаккха совгӏатаца яйлургьяц воӏ дӏаваьнна бисарий дегашта хинна човнаш, царгара гӏайгӏа. Вай доаккхал де деза, исторе бӏаьшерашка баха беза яхь йола къонгаш ба уж», - аьлар вай Мехкадас.
