Гӏалгӏайче ший аргӏагӏа тоабеш а юкъебоаккхаш а латт инженерни болх
Гӏалгӏайче дӏахьош ба, федеральни центра хьал а лоацаш, инженерни болх, аяхаш, хоам бу «Сердало» газетага ГӏР Кулгалхочун зарбан болх лелабераша.
«Аз хьалхашка оттадаьча декхарах, Магасе, Наьсаре, Магӏалбике хиш цӏендара гӏирсаш хьалдеш латт.
Российски Федераце сенатора Илезанаькъан Микаила дийцар Россе ЖКХ гӏишлон Министра гӏончаца Ересько Алексейца проект кхоачашъяра керттера хаттараш.
Цхьацца долча хаттарех бартчӏоагӏо а яьй. Иштта лаьрхӏад цхьана кхетаче дӏаяхьа, Совет Федераце викалаш дакъа а лоацаш, дӏахо бе безача балха хоадам бара», - аьлар республикан кулгалхочо Келаматанаькъан Махьмуд-ӏаьлас.
Республике кхоъ таханарча заман хиш цӏенду гӏирсаш хьалдаро таро лургья экологически хьал тоаде. Цунца цхьана тоалургда бахархошта лоаттадеш дола коммунальни хьалаш. Уж гӏишлош ца хилча яргьяц хьаӏовш дола хиш цӏендара, экологически цӏена ӏалама таронаш лораяра, уж ца хилча, эзараш болча наьха дика вахар хургдац».
Мехкадас иштта белгалдир, Илезанаькъан Микаила из декхар кхоачашдеш хилар федеральни балха оагӏонца цхьана ший ханнахьа из проект кхоачашъяра.
Республикан бахархошта из лоархӏаме хилар дӏалоархӏ, Гӏалгӏайче 2026 шу экологе Шу хиларах.
Карарча хана, федеральни центра хьаллоацаш хиларах, Шолже говзанчаша, болхлоша хьалдеш да керда 16 эзар тонн кубометр ден-бус хиш цӏенду гӏирсаш. Уж балха юкъедаьнначул тӏехьагӏа, таро хургья хиш дика дӏадахийта, иштта дикал йолаш хий цӏенде Шолже, Илдарха-Гӏалий тӏа, кхыча доал дара даькъ тӏа бахача наха, оттаяьча ханал хьалха уж кхоачашдергда.
