Карагӏдаьннараш дувцаш, дӏахо дегӏаахара керттера декхараш белгалду
Хӏара шера паччахьалкхено ше баьча балха чаккхе яр - из таро я боагӏача тайпара мах оттабара, дӏахо де дезар белгалдара, яхаш, дийцар ГӏР кулгалхочо Келаматанаькъан Махьмуд-ӏаьлас.
«Из я бахархошца къаьгга къамаьл дара лоархӏамегӏа йола оагӏув. 2025 шера баьча балха чаккхенга хьежача, тешаме ала йиш я дика къахьийгад вай мохк дегӏабоалабеш, белггала толамаш а даьхад, уж хӏанз хоалуш а да, наьха вахара хьалашка хьежача. Цу балха керте латт - дика вӏашагӏбелла массайолча оагӏорахьара ӏаьдала болх, иштта Россе Президента Путин Владимира белгалдаь декхараш кхоачашдар. Республика дегӏаяра керттердар да вай Кулгалхочо белгалъяь къаман проекташ», - аьлар Мехкадас.
Къаман проекташ хиларах, доккха новкъостал хул лоархӏамегӏа дола декхараш кхоачашдеча – ишколаш хьалъеча, коммуникацеш дегӏайоалаеча, доал деча даькъ тӏара хьал тоадеча.
2025 шера вахара юкъеяьккхар 38 моттигера проект, царех 28 ахчанца ӏалашйир, федеральни ӏаьдалца чӏоагӏо яь ма хиллара. Цу юкъе да дувцача гӏулакха хьахьожадаь ахча ший доагӏача беса дӏадахийта хилар, из бахьан долаш дика таронаш хилар.
Цхьан шера дукха кхетаченаш дӏайихьар, хьалъяь яьлар, болх бе йолаелар итташ йола гӏишлош. Уж я ишколаш, иштта ДОУ, наькъаш тоадир; культуран моттигаш, хин хьал, доазонаш тоадир.
2019 шера дӏайолаяь, 2025 шерга кхаччалца дӏахьош йола къаман программаш кхоачшъяро 460 совгӏа балха моттиг дӏайихьар, царга дӏадахар 48 млрд сом совгӏа. Паччахьалкхен программаш а тӏехьа дӏалаьрхӏача - 685 моттиг я уж.
Уж деррига толамаш, Келаматанаькъан Махьмуд-ӏаьлас яхачох, керда де лерхӏачун кӏийле я. 2026 шера къаман проекташ кхоачашъяра 5,3 млрд сом дӏадахийта лаьрхӏад. Цу юкъейоагӏа керда проекташ, цар чулоац дегӏаахара керттера лостамаш.
Республикан ӏаьдало даим ший теркама юкъе лоаттаду бахархой вахара хьалаш тоадара хаттар. Царна новкъостал лоаттаду, къаьстта дукха дезал барашта. Дӏахо дӏахьош ба дешар, кагирхой политика дегӏайоалаяра болх: хьалъеш я керда ишколаш, цӏенхаштта тоаеш латт дешара моттигаш, профессиональни дешара оагӏув кердайоаккхаш латт, унахцӏенон даькъ тӏа деш дар а кӏезига дац, юкъара доазонаш тоадеш латт, транспорта хьал а дикагӏа дегӏадоагӏаш да.
«Оаха дӏахо дӏахьош ба республика дегӏайоалаяра хьалаьца хинна никъ. Гӏалгӏайчен хӏара вахархо таро йолаш хургва шийна дезаш дола хьалаш хьакхолла», - аьлар ГӏР Кулгалхочо.
