Наьха жа, гаьзарий лочкъадаьр хьалехар полице болхлоша
08.06.2026 11:19
Жа, гаьзарий юкъейола бӏарчча ӏул лочкъадаьр хьалехар Магӏалбикерча полице болхлоша. Из хоам «Сердалога» бир МВД зарбан болх лелабераша.
Россе МВД «Магӏалбик» яхача МО болхлой болча латкъа венача вахархочо дийцачох, шахьара 1-ча зӏамигача кхален юхе уллача доазон тӏа дажа цо дӏахийца 15 устагӏа, 15 газа юкъе йола бӏарчча ӏул, цхьанне лочкъадаь, дайна дӏадаьннад», - йоах ӏаьдалгарча хоама тӏа.
МВД МО болхлоша, цу сахьате ларах болх дӏаболабаь, ӏул хьалехар. Соагӏапча вахача сага дига хиннад из, къоал дарах дари даьд цо. Лочкъадаь жа, гаьзарий ехка, царех хьаийцар диа ваьнна, паргӏатта дӏахо вахар дӏахьош хиннав къу.
Белгалде деза, къоал дар бахьан долаш, из хьалхагӏа суд яь хиннилга. Цунна духьала гӏулакх хьадийллад ӏаьдало.
