Наьха хӏамаш хьателача моттиге леладаь зулам гучадаьккхар полице болхлоша
Наьха хӏамаш хьателача моттиге, 500 эзар сом мах бола хӏамаш лочкъаяь саг гучаваьккхар полице болхлоша. Из хоам «Сердалога» бир МВД.
«Цӏихезача интернет-тикан хӏамаш хьателаш йолча моттига 21 шу даьннача болхлочо вӏашагӏбелла хинна тийшаболх гучабаьккхар Россе МВД «Шолжа кхален» МО полице болхлоша.
МВД белгалдечох, ший телефона чу 2025-ча шера массехк тайпара оагӏонаш хьакхелла, ший адресах тайп-тайпара хӏамаш дӏаахийта волавеннав из. Ахча дӏатела лаьрхӏа воацаш, цо дӏаийяьча хӏамашта юкъе да барзкъаш, маьчеш, компьютерцара гӏирсаш, кхалнаха батах хьекха молхаш, цӏагӏа лелаю тайп-тайпара хӏамаш, иштта пневматически оала тепча, туристически урс», - йоах ӏаьдала болхлоша.
Наьха хӏамаш цу моттиге хьакхаьчачул тӏехьагӏа, уж цига йоадаеш йола ха чакхъяллалца сабар дийя, тӏаккха кӏопилгаш хьайоасташ, чура хӏамаш шийна чукхихьай, дӏаийца доаца «товар» санна яьсса кӏопилгаш юхакхахьийтай интернет-тиканна. Цхьа ха яьлча, ше чукхихьа хӏамаш ехкай цо, хьаийца ахча ший дега ма тов лаьллад. 500 000 сома зе де кхийнад цун шин бетта. Наьха хӏама дуаш, ший таро тоае гӏийртачунна духьала гӏулакх хьадийллад; цул совгӏа, мехкара аравала йиш йоацаш, бокъо а йийхкай.
