Петардо бер лозадар мишта нийсденнад тохкаш я мехкара полици
Петардо бер лозадеш хиннача хатарах, тохкама болх дӏахьош хилар республикерча полице болхлой. Укх бетта 26-ча дийнахьа Шолжа-Шахьарерча ЦРБ 10 шу даьнна лозаваь кӏаьнк ӏочувоалаваьв, аьнна, хоам бера Россе Илдарха-Гӏалий тӏарча ОМВД болхлошка. Аьрда кулг да кӏаьнка лозадаьр. Цига хьатӏакхаьчача ӏаьдала болхлоша оттадаьчох, ший коа юкъе ловзаш воаллаш, пиротехнически оала гӏирс цун бебоаллаш ийккхаб. Лораша де дезар даь, дӏахо амбулоторни дарба дергдолаш чувахийтав из.
«10 шу даьннача кӏаьнка нана бехктокхаме озаш да ӏаьдал, боаггӏача боараме 18 шерга кхачанза долча бера тӏахьожам, терко цаярах (РФ КоаАП 5.35 ст.). Пиротехнически хӏамаш йохкаш мичахьа хиннай техка, цу тика чура еррига петардаш дӏайихьар полице болхлоша (8 кӏопилг, хӏаране чу 60 хӏама уллаш). Уж хӏамаш йохкаш хиннача тикан да а бехктокхаме озаргва. Цунна духьала 14.1 ст., 14.2 ст. административни бехк бу лоткъамаш оттадаьд ӏаьдало; болх боаггӏача боараме, йохкача хӏамай каьхаташ ӏаьдала бокъонца хила деззача тайпара лертӏа цахиларах», - йоах «Сердалога» мехкарча Россе МВД зарбан болх лелабераша.
Полице болхлоша хьалхадоаккх, берий кхерамзлен хьал лорадар даь, наьна лоархӏаме декхар долга. Боккхагӏбарашка кхайкарал ду ӏаьдало, 18 шерга кхачанза долча берашта тӏахьожам лоаттабеш, кхераме йола хӏамаш, пиротехника эца йиш йоацилга хьалхадоаккхаш хила, яхаш. Петардаш дегӏа геттара доккха зе де тарлуш хӏамаш я. Из тайпара хӏама эцаш хилча, уж лертӏа хилара тешал деш дола каьхаташ дий хьажа веза йохкарашка. Бокъо йоацача тайпара пиротехника йохкаш моттиг хоаеннаяле, регионерча МВД хоам бе беза ӏалаьмате чехка укх номерах: 8 (8734) 55-01-54.
