Гӏалгӏайчен дешархой ӏомабу бокъонаш йовза
Гӏалгӏайчен Наьсарен кхален дешара моттигашка кхетаченаш дӏайихьар. Уж лаьрхӏа яр кхувш боагӏарашта юкъе бокъонаш йовзийта. Дешархошца кхетаче вӏашагӏъеллар кхувшбоагӏарий гӏулакхах йолча комиссе говзанчаша, кхувш боагӏарий гӏулакхех долча даькъа болхлошца цхьана. Уж цига бахара керттера маӏан дар, кхувш йоагӏача тӏехьенна шоай бокъонаш йовзийтар, иштта шоаш леладеча хӏаман хьалхара жоп дала дезаш уж хилар хьалхадаккхар.
«Сердало» газетага Наьсарен кхален администраце ма аллара, берашта эксперташа хьалхадаьккхар царна ха дезар, царца безаме къамаьл а хилар, долаш дола законаш, цар боарам белгалбир. Къаьстта терко тӏаяхийтар харцача наькъ тӏа валаро бехктокхаме оттавеш хилара, кагирхошта юкъе къамашта юкъера къовсамаш цалеладара. Цу тайпара леладеча харцахьарча гӏулакхех цар шоай хургдола вахар а толхаде тарлу, аьнна белгалдир.
Дӏахо дийцар дезалера бокъонех лаьца. Цига къоастадир даьй-ноаной, берий декхараш, законо дӏадехараш. Говзанчаша дика масалаш доаладеш, царна хьалхадаьккхар уж декхараш кхоачашдеш ца хилча дӏахо вахара, бокъонаш лораяра оагӏорахьара малагӏча бехктокхаме озаргва хӏара харцваьнна саг.
Дийцар дикагӏа дӏа эцаргдолаш, царна елар цу лостамагӏа йола буклеташ, цу тӏа дар чоалхане хьал эттача хьалхарча аргӏагӏа ха дезар.
