Къонача тӏехьенна нийса никъ хьехаш, болх бу мехка
Юкъерча Ачалкхерча № 15 йолча ишкола дешархошца кхетаче дӏайихьар. Кхувш латтарашта нийса никъ хьехаш, малагӏча гӏулакхех лоравала веза белгалдеш, яр из моттиг. Шоай ӏадаташ, беркате оамалаш лораеш, воча хӏаман юстара болаш вахара никъ дӏабахьа безилга дийцар къонача тӏехьенна.
«Кхетаче дакъа лоацаш бар кхален администрацерча АТК оагӏон кулгал деш вола Джамболатанаькъан Мухьмад, цу оагӏонцара болхло Цӏечой Руслан, иштта дийша нах. Дешархошта дийцар хӏара сага ший никъ сийрда, цӏена хургболаш къахьега дезарах, водар доаржаде, юкъедаккха гӏертача зуламхошка ладувгӏа, цар яхар теркалде йиш цахиларах.
Интернета оагӏонашка гӏолла терроризм, экстремизм яха зулама юкъе къонабараш чуоза, цар сакхетам тувлбе гӏертарашца бувзаме хила йиш йоацилга, моллагӏа тешаме доаца хӏама теркалдича, ӏалаьмате чехка ӏаьдала болхлошка хоам бе безилга хьалхадаьккхар гулбеннарашта».
Из хоам «Сердалога» бир Магӏалбика кхален администрацера. Дешархой дукха хаттараш дар боккхийбарашка. Цар мел дола хаттараш доашхаш болх дӏабихьар цига. Белгалде деза, иштта йола кхетаченаш дӏакхахьар тахан вай къона тӏехье лораеш бола лоархӏаме болх болга.
