«Долакха-Юрт - Гӏайрбик-Юрт» яха никъ тоабеш боахк болхлой
«Гӏалгӏай республикерча наькъий хьал тоадар» яхача моттигерча программага гӏолла «Долакха-Юрт-Гӏайрбик-Юрт» яха никъ тоабеш боахк карарча хана. Бархӏ километр ба тоабеш латта никъ. Из лоархӏаме никъ ба тахан, цунга хьежжа машинашта кхераме боацаш, паргӏата хила беза.
«Болх, ма хулла сихагӏа чакхбаккха гӏерташ, тӏатеӏӏа дӏахьош ба. Кхо километр совгӏа долча доазон тӏа асфальт ӏобилла баьннаб карарча хана, дӏахо кӏалхара кӏийле кийчъеш боахк болхлой. Никъ дуккхача шерашка лертӏача хьале болаш, ца бохаш латтаргболаш, цул совгӏа, дӏа-хьа ухарашта боаггӏача боараме паргӏата хргболаш къахьегаш ба цига», - дийцар «Сердало» газетага мехкарча машиний наькъий гӏулакхех йолча Министерстве.
Массехк оагӏонца дӏабахьа безаш боккха болх ба из. Эггара хьалха кӏалхара кӏийле тоае, шаьръе еза, тӏаккха ше-ший аргӏагӏа дӏаходараш кхоачашдеш.
Беррига болх йистебаьлча, наькъашкара бокъонаш белгалъеш йола гӏирмаш оттаяь, наькъ тӏа басарашца белгало еш къахьегаргда. Йиллача хана чакхбала безаш ба из лоархӏаме болх.
