Яндар яха хий цӏендеш боахк мехка
Яндар яха хий цӏендеш бола болх ба Яндаре дӏаболабаь. 4, 7 км йолча моттигах таханарча дийнахьа 2, 5 км хин моттиг цӏенъяь баьннаб болхлой. Къаьстта терко ю чоалхане йолча моттигашта.
«Хи чу лакха баьцаш я дукха, хӏаьта цхьайолча моттигашка хин паргӏатта ӏодаха новкъарле еш гаьнаш я. Беррига болх чакхбаьлча, хин гонахьа керда гаьнаш дӏайогӏа лерхӏ. Бердаш чӏоагӏдара тӏехьа эшаш да из», - дийцар «Сердалога» ӏалама гӏулакхех йолча министерстве. Хин хьал меттадоаладеш бола болх дӏадахача шера дӏаболабир.
Догӏаш латтача хана цхьаккха тайпара хатар хургдоацаш, ханнахьа чакхдаккха дезаш гӏулакх да из. Цу балхо аттача доаккх 28 цӏен, иштта царех дӏахетта йолча моттигий хьал. Хий айденна хатар хилча, шоашта зе хилар кхераш хинна 155 вахархо а паргӏата хургва, кхы кхера ца везаш. 2027-ча шера йистебаккха лерхӏ из болх.
