Мехкара шахьараш, юрташ дӏахо тоаеш я
Вахарера моттигаш тоаярах йолча къаман проектага гӏолла, боккха болх дӏахьош, хувцамаш деш латт вай шахьарашка, юрташка. Укх шера цу программан юкъеяхараш 25 моттиг я. Царна юкъерча 8 моттигера болх йистебаьннаб – Шолжа-Шахьарера, Илдарха-Гӏалий тӏара биъ-биъ урам тоабеш къахьийгад. Йисача Наьсарерча, Магасерча, муниципальни кхаленашкарча 17 моттиге болх хьинаре дӏахьош латт.
«Керттердар, уж хувцамаш бахархоша теркалдеш хилар да. Проект чакхъяьккхачул тӏехьагӏа урамашка паргӏатагӏа, скверашка хозагӏа, хувцамаш даьча кхыйолча моттигашка шоай дезалца арабаьнна салоӏаш, ха дӏахьош багӏа аьттув болаш хила деза. Ма дарра аьлча, наьха вахара хьал аттачахьа доаккхаш хила деза хувцамаш. 2019-2024-ча шерашка вай мехка меттайоалаяьраш 190 моттиг я, кхы а 24 моттиг – 2025-ча шера. Ерригача республикан куц эргадаьккхараш 200 совгӏа моттиг хул тахан», - белгалдир вай мехкадас Келаматанаькъан Махьмуд-Ӏаьлас.
Республикан кулгалхочо белгалдечох, из болх лаьгӏлургбац, кхы а шерагӏа баьржа мара. Дикача оагӏорахьа хувцамаш дар да керттердар. Урам тӏа араваьннача сага хӏара денна паргӏатагӏа хургйолаш, кхоачамбоацараш ма могга юстардоахаш, къахьегаш ба тахан мехка. Цунга хьежжа, мехка хӏара миӏинге хургда хувцамаш; шахьарашкара, юрташкара хьал дикка хувцаденнилга зувш хургба нах.
