Гӏалгӏайчен прокуратуро дӏадех, Хамхе яха шира юрт тоаяр
Гӏалгӏайчен Жӏайрахьа кхален прокуратуро тӏахьожама болх дӏабихьар, культуран тӏехьален моттигаш лораяра законаш лорадой хьожаш. Цига теркалдир республикан исторически лоархӏамеча сийленгех цаӏ - Хамхерча гӏалай архитектуран хьал, из я федеральни доалахьа лоархӏаш йола культуран тӏехьален гӏишло.
«Тӏахьожама балхо хьагойтар, архитектуран тамашийна сийленг воча хьале хилар. Говзанчаша белгалдир гӏала пенаш дукха ийттӏа, лардаш вӏашагӏйийна хилар. Хӏанзара технически хьал чухарцара гарга да, из ше еррига а харцар кхерам болаш а я. Законо дӏадехаш ма хиллара, уж моттигаш тоае а лорае а езар уж балхаш леладу боахамаш да. Цунца дувзаденна, Жӏайрахьа кхален прокуратуро лоткъам суде дӏабахьийтаб», - аьлар «Сердало» газетага Гӏалгӏайчен прокуратуре.
Тӏахьожама боахамо Гӏалгӏайчен культуран тӏехьален моттигаш лораяра йола паччахьалкхен Комитет, Хамхи яха комплекс тоаяра- меттаоттаяра болх вӏашагӏболлара декхарийла елга дӏадех. Кхоачамбоацараш юстардахар, тоаяра болх дӏабахьар Жӏайрахьа кхален прокуратура теркама юкъе да.
