Гӏалгӏай мехка кхетаче хилар СВО доакъашхошцеи цар дезалашцеи
«Даьхен лорабой» ганза Паччахьалкхен моттигерча филиале нах тӏаэцаш вар Гӏалгӏайчен сага бокъонех вола викал Цӏечой Ибрахӏим. Из кхетаче вӏашагӏъеллаяр лаьрххӏача операце доакъашхошта, цар дезалашта новкъостал де. Цу тайпара бувзам лелабаро таро лу дикагӏа новкъостал лоаттаде, иштта бӏухошта хьалхашка нийслуш дола хаттараш кхоачашде.
«Нах тӏаэцаш ди долаш викал волча бахархой дукха баьхкар, шоай хаттараш дахьаш, дукхагӏча даькъе царна дезар дар вахара оагӏонца новкъостал дар. Викало хӏара сага хаттар дика техкар, царга массанега ладийгӏар. Дерригача хаттарех бокъонаша дӏадеххача тайпарра хьехамаш дир, царна ӏаьдала малагӏа аьттонаш лу, ахчаш хьадалара бокъонаш хьалхаяьхар. Дӏахо тахка дезаш дола хаттараш йоазонца чӏоагӏдир, уж ший тӏахьожаме ийцар», - аьлар «Сердало» газетага ГӏР УПЧ хоамий-аналитически даькъ тӏа.
Тӏехьа ца тетташ, сиха СВО доакъашхой, цар дезалий хьашташ кхоачашдар Цӏечой Ибрахӏима керттера лоархӏаш дола декхар да. «Даьхен лорабой» ганзаца цхьана болх дӏабахьаро таро лу уж дикагӏа кхоачашде, цхьаккха хаттар теркал ца деш ца дуташ.
«Даьхен лорабой» ганзо, сага бокъонех волча Викала аппарато цу тайпара нах тӏаэцаш болх каст-каста дӏахьу, ӏаьдала болхлошца; из СВО доакъашхой, ветераний хьашташ кхоачашдара ду.
