Мах боацаш, бокъонаш лораярах хьехамаш деш, Ди хилар мехка
Сага бокъонех волча викала Цӏечой Ибрахӏима бахархой тӏаийбу ди дӏадихьар ше волча. Цу кхетаче дакъа лоацаш яр Адвокатий палата Президент йола Ховтанаькъан Зарета, Паччахьалкхен юридически даькъа кулгалхо Бештой ӏийса. Мах боацаш мехкарча бахархошта ӏаьдала оагӏонца гӏо дарах йолча вахара проектага гӏолла дӏахьош бар из болх. Цу оагӏонцара наьха вахарера кхоачамбоацараш довзара тӏехьа йоаржаеш я из проект.
«Бархӏ саг вар цу дийнахьа хьакимашта цхьацца хаттараш дахьаш тӏавенараш. Шоай бокъонаш лораяра тӏехьа гӏо дехаш бар нах, иштта юридически оагӏонцара цхьаццадараш довза ловш бар. Хӏара вахархочун дехар ма дарра тохкаш, доашхаш къахьийгар кхетаче, хӏаьта дикка болх дӏахьош дашха дезараш Цӏечой Ибрахӏима ше терко еш тохкаргда, аьнна, дӏаяздир», - дийцар «Сердало» газетага мехкарча УПЧ.
Белгалде деза, иштта дӏахьош йола кхетаченаш бахархошта дикка пайда беш йолга, моллагӏа нийсденна кхоачамбоацараш цу оагӏонцарча хьакимашка гӏолла ма дарра тахка, дашха аьттув боал наьха.
