«Кагбеннабоацараш» яха къам мехкахдаккхарца ювзаенна дагалоаттама сайре
ГӏалгӀайчен Наьсарен кхален Сурхо тӀа «Кагбеннабоацараш» яха кхетаче хилар, из кийчъяьяр ГӏалгӀайчен кагирхой театра актёраша, Наьсарен кхален культуран Цӏен болхлошца цхьана. Из хетаяь яр тийшача балхах деррига гӀалгӀай къам ший мехках дохадаь; Казахстане, Юкъерча Азе Ӏодахьийта 82 шу дизара. Из дицденна ха йоагӏаргьяц вай къаманга цӀаккха а. Сурхо тӀарча культуран ЦӏагӀа гулбелар гӀалгӀай къаман тӏабена хинна бала бекъа, цун исторен оагӀонаш йовза безам бараш.
«Сайре дӀахьош, го йиш яр цу унзарча ханашкара сурташ, цига хиннача наха а дийцар шоашта дагадоагӀараш, дӀабахача шоай даьша дийцар дагаухар царна. Цига хезар йоазонхочун Ахмадовгӏар Мусай кхоллама мугӀараш, иштта ГӏалгӀайчен артисташа Охценаькъан Розай, Оздой Адама иллей композици. Зале мел хиннар уйлангахьа ваха вар. Вай дицде йиш яц вай дай, ноаной сага ла йиш йоацача халача вахара хьалех чакхбаьнна хилар. Цар цӀаккха а догдилла ха хиннаяц шоаш юха шоай мехка баргхиларах, цар дегашка хиннаб шоай Даьхенцара безам, шоашта Дала денна деза лаьтта дита могаш хинннабац уж», - аьлар «Сердало» газетага из кхетаче вӀашагӀъеллараша.
«Кагбеннабоацараш» яха сайре дагалоаттам хинна Ӏацар, цо хьалхадоаккхар моллагӀа йола халонаш тӀехьайита къаман денал хиннилга. Нохч-ГӏалгӀай мехках бахар - из бала бале а, цунца цхьана доаккхал а да, цу халонашта духьалъэтта; къаман культура, мотт лорабеш; юха мехкабала денал цар хилар. Вай мел дах а из дагалаттаргда ноахалгара, ноахалга кхоачаш.
