Гӏалгӏайче дӏабихьар «Даим цхьана» яха болам
Гӏалгӏай къаман дагалоаттама, сийлен Мемориале «Даим цхьана» яха дешара болам дӏабихьар, из хетабаь бар Гӏалгӏайче Россех дӏакхетара. Из болх вӏашагӏбеллараша лаьрхӏар, ши бӏаь совгӏа шу хьалха гӏалгӏай къамо тӏаийца Российски паччахьалкхенах дӏакхетар кхувш йоагӏача тӏехьенна довзийта. Мохк дегӏабара, цун культура, белгалонаш лораяра, вошала бувзам чӏоагӏбара ди хилар цох.
«Болама юкъе дакъа лоацаш бар Наьсарен №19 йолча ишкола дешархой, царна тха экскурси еш хиннача Гӏазданаькъан Миланас гойтар Мемориала комплекс, цигара гӏалгӏай къаман исторена хетаяь оагӏонаш. Комплекса сийленгаш, скульптура гойташ яр вай цӏихезача наьха вахара исторе оагӏонаш, паччахьалкхе дегӏайоалаеш цар юкъедена лоархӏаме дакъа.
Тӏехьагӏа экскурси дӏайихьар вай къам мехкахдаккхарах болча дагалоаттама Мемориала комплекса музее, цига берашта гойтар массаза хилда аьнна хьалтеха сурташ. Из болам дӏахьош, доакъашхошта Гӏалгӏайче Россех дӏакхетарах бола хоам тӏабола каьхаташ делар», - аьлар «Сердало» газетага Гӏалгӏайчен МКЖР.
Болама доакъашхоша белгалдир, цу тайпарча кхетаченаша новкъостал ду исторически дагалоаттам лорабе. «Даим цхьана» яхача боламо цӏаькха а хьагойтар, къаман низ цун барт хиларца болга.
