Гӏалгӏай мехка дӏайихьар, «Сунт» яха полице йоккха операци
Дӏадахача кӏирандийнахьа «Сунт» яха йоккха балха операци дӏайихьар Гӏалгӏай мехка. Из болх дагабехараш бар Госавтоинспекце болхлой, республикан кхыча полице боахама викалашца цхьана. Из болх дӏабихьар Гӏалгӏайче гӏолла йолча Россе МВД кулгалхочо, полице инарал-майора Котов Владимира соцамах.
«Сунт» яхача цу балха чудоагӏаш, госавтоинспекце викалаш чухьежар 180 автомобила, 195 сага. Закон лорадераша юхатехар 180 бокъонаш телхаяр. 10 транспорта чухьежар, балха тӏа леладеча жӏалешца. Хьа а яьккха, лаьрххӏача моттиге дӏаоттайир 17 автомобиль. Транспорт лелаяра бокъонаш йоацаш 14 саг гучаваьккхар инспектораша. Царех юха ца соцаш вада дагахьа хинначунна, полици тӏехьаяьлар. Из хьалаьцар. РФ законо дӏадеххача беса из бехктокхаме озаргва.
Иштта Илдарха-Гӏалий тӏа соцавир, автомобила чура герз арадийтта маӏа саг. «Сунт» яха операци дӏахьош, Промыслови урамах, полице болхлошта дайра хьоалчагӏан машинашца хиннача наха герз арадетташ. Из саг сиха хьалаьцар. Цунна духьала административни бехк беш дола каьхаташ кийчдир. Из гӏулакх хӏанз тохкаш да», - аьлар «Сердало» газетага Гӏалгӏайче гӏолла йолча Россе МВД.
Гӏалгӏай полицейскеша белгала ма дарра, дукхагӏа моттигерча водителаша харцахьа дер да, наькъа гӏод тохарах уж ца кхерар, машина кораш геттара цар баьддаь хилар.
