СВО веннача виъ мехкахочун таьзеташ хилар республике
Тӏема операце моттигашка шоай декхараш кхоачашдеш лаьтта вай мехкара виъ бӏухо кхелхав, аьнна, сагота хоам бера мехка. Тӏема аренашка къонгаш боврах гӏайгӏа кхаьчача наьха оагӏув хьаллаца, царгара сагото екъа баха хилар мехкарча паччахьалкхера викалаш, Мехкадаь Администрацена кулгал ду Мархенаькъан Анзор хьалха волаш. Во кхаъ бенарий дог тедеш къамаьл дир цар Ӏаьлий-Юрта Цхьорой Асланбеках, Илдарха-Гӏалий тӏа Йовлой Акроматах, Эбиташвили Абибох, Магӏалбике Зайтанаькъан Микаилах даьхкача таьзеташка.
«Тӏема декхараш, Украине кхачале, дика довзаш вар Цхьорой Асланбек. Эскаре артиллерийски взвода командир волаш, тӏаккха «минометни даькъе» декхараш кхоачашдеш хиннавар из. Саг чувоацаш, гӏетташ долча гӏирсаша даьча довнах веннав из. Гӏалгӏай мехка дукхача хана денз бахаш болча гуржий цӏен тӏара вар Эбиташвили Абибо. Цӏен-нана, зӏамига бер дисад цун. Йовлой Акромат шийна лайна вахавар СВО. Чӏоагӏа тешаме, аьннача дош долаш, гӏо де кийча волаш саг вар, яхаш, тешал ду цунна из вовзараша. Зайтанаькъан Микаила эскарера воаллашехь, дӏаваха лаьрхӏар СВО», - йоах «Сердалога» мехкарча Паччахьалкхера бенача хоамо.
Тӏемхой гаргарча нахаца къамаьл деш, СВО доакъашхой дезалашта доагӏача лаьрхӏа долча вахара оагӏонцарча картайх хьоахадир тахан. Цу каьхатага гӏолла паччахьалкхенгара шоашта хьадоагӏаш дола хӏама хьаэца, моллагӏа гӏулакх чакхдаккха аттагӏа хул наха. Цул совгӏа, къонгаш байна бисарашта вай мехкадаьгара Келаматанаькъан Махьмуд-Ӏаьлагара гӏо дӏаделар. Бейнарашта Дала гешт долда, Дала къахетам болба!
