«Лорале – бераш!» яха болам ба, вай мехка боаржабеш
«Лорале – бераш!» яха болам ба вай мехка укх бетта 25-ча денгара 29-ча денга кхаччалца дӏахьош. Ахкан денош хьакхоачаш цӏагӏа сеца бераш лорадара, фийла хилара тӏехьа боаржабеш ба из болам мехка.
«Наькъашкара хьал лорадеча ӏаьдала болхлоша машинашца леларашта хьалхадоаккх, наькъашкара бокъонаш цалархӏаро хатараш доаржаделга, царна шоашта санна кхыбарашта а боккха бала белга. Ишколера бераш цӏагӏа сайца ха я хьаэттар, бераш наькъашка дукхагӏа хургда, цунга хьежжа геттара фийла, машин боарамал тӏехвоалаш ца лоаллаш, хила веза машина лехкар», - дийцар «Сердалога» полице болхлоша.
Мехкарча полице болхлоша кхайкарал ду даьшка, ноаношка: боккъал а ахкан салоӏа денош латтача хана; шоай бераш лорадеш, уж мичахьа лел хьожаш хила, яхаш. Даьша, ноаноша берашта хӏара дийнахьа хьалхадаха деза наькъашкара бокъонаш лораяр лоархӏаме долга, цул совгӏа, 18 шерга кхачанза дола бераш цхьаь ара ца дилийтача бакъахьа да. Бераш ловза, ха дӏаяхьа гуллуш йолча моттигашка кхаьчача; къаьстта чӏоагӏа лоралуш, машин сиха ца хехкаш хила беза водителаш.
