Вайцига болх беш ба «Бийса йоаккхаш яр дошо морхилг» яха видеогойтам
Гӏалгӏай къам мехкахдаккхара дагалоаттама Мемориале болх беш ба «Бийса йоаккхаш яр дошо морхилг» яха видеогойтам. Из хетабаьб Приставкин Анатоле 95 шу дузаш хилара. Цу гойтаме го йиш я, СССР меттел, цун доазол арахьа а наха безаш тӏаийца цӏихеза кхоллама болх. Цига хьабоагӏача наха кийчбир тамашийна гойтама кечалаш тӏадола болх, цига иштта го йиш я исторически каьхаташ, автора вахарера драматически оагӏонаш, книжкаш тӏара йоазош, цун кхоллама болх.
«Къаьстта йола моттиг дӏалоац экрана тӏа режиссера Мамилганаькъан Сулумбика хьакхеллача балхо. Из фильм арадаьннача хана, наха юкъе чӏоагӏа дувцаш дар. Цига, къайла ца хьош, гойташ дар сага бокъонаш, исторически дагалоаттам лорабарца дувзаденна хаттараш. «Бийса йоаккхаш яр дошо морхилг» яха повесть бахьан долаш Приставкина СССРа Паччахьалкхен преми елар, цо культуран даькъ тӏа къаьстта йола моттиг дӏалаьцар. Йоазонна таржам дир дунен 30 меттала, хӏаьта из ший мехка арадаьлар 4,5 миллион экземпляр», - аьлар «Сердало» газетага гойтам вӏашагӏбеллараша.
Кийчбаьча гойтамга хьажа таро я ардара бетта 19-ча денга кхаччалца.
