Болх беш болча даьшта, ноаношта ахча хьожадергда ӏаьдало
Аьтинга бетта 1-ча дийнахьа денз, бахархошкара дехараш чуэцаш хургба мехкарча Вахара ганза оагӏон болхлой. Болх беш болча даьшта, ноаношта ахча хьожадарах бола керда болх ба дӏаболабеш.
«Бокъонга диллача, из ахча эцара юкъеболхаш ба шиъ, шиннел дукхагӏа бераш дола даьй-ноаной, бераш хьаийцараш, берашта доал дераш. Цу юкъе долх 18 шерга кхачанза дола бераш, иштта 23 шерга кхачанза бола очно дешараш. Из ахча доагӏа дехар чуденнар, бераш РФ бахархой бале, массахана Россе бахаш болаш. Цул совгӏа, балха тӏа болаш, НДФЛ дӏачутелаш, алиментех декхар тӏалатташ боацаш, хӏара бера доагӏар 1,5 вахара эшача боарамал тӏехданна доацаш хила деза. Иштта цига теркаме лоац цу наьха таро а», - белгалдир ОСФР.
ӏаьдала дӏачутийнача йоалацара ахча 6%-га кхоачаш юхалуш гӏулакх да из. Бакъда, НДФЛ алапе тӏара дӏачутийна боацараш цу юкъе бац. «Бераш долча дезалашта новкъостал дара тӏехьа боаржабаь болх ба из. Даьшта, ноаношта нийса ах ахча юхалу цар из берий дешара, цар хӏама тоадара тӏехьа дӏадохийтаргдолаш», - белгалдир мехкарча СФР оагӏонна кулгал деча Йовлой Зубейра.
Дехар чудала йиш я аьтинга бетта 1-ча денгара ардара бетта 1-гӏа ди тӏакхаччалца. 2026-ча шера 2025-ча шера доагӏаш долча ахчах дехар чудала аьттув ба Госуслуги яхача порталага, СФР оагӏон моттигага гӏолла е МФЦ.
