Гӏалгӏай мехка ишколай наьна меттала долча дешара книжкаш тӏа болх беш ба
Гӏалгӏайчен, ӏоахарганаькъан Ч.Э. цӏерагӏча гуманитарни ӏилма-тохкама институте кхетаче хилар, юххьанцарча классашка дагӏача берий ишколашкара гӏалгӏай метта дешара-методически хьал тахкара. Кхетаче дӏайихьар Гӏалгӏай Республикан Паччахьалкхен Председатела гӏончас Мутаӏаланаькъан Хьажбикара кулгал деш. Цун балха юкъе дакъа лоацаш хилар мехка дешара, ӏилман Министерствон викалаш, дешара болхлой, говзал лакхъяра Института болхлой, иштта цунна чуйоагӏача моттигий говзанчаш, литература кхоллара юкъе дакъа лоацараш.
«Гӏалгӏай метта, 1-4-ча классай дешара книжкаш хӏанз юххера арадалара даькъ тӏа кхаьчад. Уж дешара юкъедахара йола оагӏув йийцар гулбеннараша. Хӏанзчул тӏехьагӏа, цхьацца дола хьалаш юкъедоахаш, уж кийч а даь, Российски Федераце дешара Министерствоца чӏоагӏ а даь, арахецара ха хоадае езаш я», - аьлар «Сердало» газетага ИнгНИИ.
Института говзанчаша дика дакъа лаьцад, уж книжкаш кийчдеча, уж кийча ба ИнгНИИ гӏишлон чу цу гӏулакха йола моттиг хьакъоастае. Цига кхоачашбергба къаьстта дешара-методически, иштта редакционно-издательски оагӏорахьара гӏалгӏай метта, иштта къаман ӏадатий оагӏон дешара болх.
Цо таро лургья лаьрххӏа йола отдел хьакхолла, цул совгӏа сихагӏа арахеца таро хургья юххьанцарча ишкола дешара книжкаш, дешара-методически беррига болх цхьана вӏашагӏболла таро лургья.
Керда дешара книжкаш накъадаргда метта боарам ӏомабара, гӏалгӏай къаман культуран тӏехьале берашта йовзийтара.
