Гӏалгӏайче лоаман хий Эса цӏендир, бердаш чӏоагӏдир
Гӏалгӏай мехка аьтинга бутт чакхбоалаш дӏадоладаь хинна балхаш дӏахьош, лоаман Эса яха хий а цун берда йистош а цӏенйир Галашка, яхаш, хоам бу «Сердало» газетага Гӏалгӏай Республикан ӏалама Министерствос.
«Хӏара шера, бӏаьстан хиш доагӏача хана, 50 совгӏа Заречная урамах баха нах бала озаш хул, берда йистошкара хий арадоалаш хиларах. Шераш дӏа мел ух берда йистош чухерцар кӏоаргденнад 4-12 метр. Наьха цӏенош а цар доалахьара лаьтташ а лорадара, Гӏалгӏай Республикан кулгалхочо Келаматанаькъан Махьмуд-ӏаьлас тӏадиллача декхарах, мехка ӏалама тароний, экологе министерствос, «Дагводресурсы», «Центррегионводх-оз» ФГБВУца цхьана дӏадахьа деза балхаш вӏашагӏдехкар», - аьлар ӏалама боахамо».
Хьалхарча аргӏагӏа говзанчаша кхертӏошца чӏоагӏйир берда йистош 80 метр, юкъара дӏоахал - 400 квадратни метр. Дӏахо хин йистош кӏоаргйир 400 метр йӏаьха йолча моттиге.
Из лоархӏаме болх дӏахьош юкъеяьккхар КамАЗ, экскаватор, бульдозер, автобензовоз.
Цу тайпара соцадир берда йистош хиво йохаеш чухецар, доккхий хиш доагӏаш моттиг хуле а, аьнна, наьха кхерамзлен ӏалашо йир.
