Toyota Camry машин эцаш баь тийшаболх гучабаьккхар
Машин эцаш бӏарчча тийшаболх кхостабаь хиннача мехкахочоа духьала гӏулакх хьадийллар Магасерча Россе МВД оагӏон болхлоша. Из хоам «Сердалога» бир цу моттигера.
«1 миллиони 650 эзар соми мах бола Toyota Camry яха машин ийцай цу сага, мехкахочунга ахча дӏалургда ше, аьнна. Бакъда машин дӏайигачул тӏехьагӏа, цхьацца бахьанаш доахаш, ахча дӏалуш хиннавац, дӏахо – бувзам хоадабаь вайна дӏаваьннав.
Ше ӏехаваьлга кхетадаьча вахархочо полице болхлой оарцагӏбаьхаб», - йоах тхога бенача хоамо. Дикка къахьийгача ӏаьдала болхлоша тийшаболх баь зуламхо хьалехар. Цо дари дир, машинах дола ахча юххьанца денз ше вӏалла дӏадала лаьрхӏа хиннавац, аьнна.
Машин йохкаш хинначун ше бехктокхаме саг ва, аьнна, моттийта арендах хьаийца Kӏa K5 дӏаеннай цо ланна, ший машин я, аьнна, оапаш бийца. Наьха машин каракхаьчача из сиха ехка, цох хьаийца ахча ший дега ма тов дехкад. Из саг тахан ӏаьдала кара ва. Иштта долча кхыча зуламашта юкъе из хиннавий тохкаш къахьегаш ба ӏаьдала болхлой.
