Лакха начӏал дола лораш гучабувлаш латт вай мехка хӏара денна
Кандидатски диссертацешцара болх лакхача боараме чакхбаьккха ши саг ӏотӏакхийтар вай унахцӏенон оагӏонна. «Сердалога» из хоам цу лостамагӏа йолча министерствера бера.
«Лумумба Патриса цӏерах йолча къамашта юкъерча доттагӏала Российски университете кандидатски диссертаце болх гойташ хилар лор аллерголог- иммунолог Пхьугой Хади. Цу оагӏонцарча лазарашта дарба дар мишта хила деза гойташ ба из болх.
Иштта Бакулев Н.А.цӏерах йолча дега хирурги НМИЦ кандидатски болх гойтар дега лор-хирург волча Мамилганаькъан Мухьмад-Башира. Кардиохирурги оалача оагӏонца эггара халагӏа лоархӏаш долча «аотрта А хьиспе йохар» яхача лазара хетабаь ба цун болх», - йоах тхога бенача хоамо.
Лакха говзал гойташ белгалбаьлар вай мехкара лораш. Моттигерча унахцӏенон министерстве даькъалабийцар уж цу толамца! Аьттув болаш, беркате, иразе, кхы а дуккхача толамех дизза хилда цар денош дӏахо а!
