Гӏалгӏай мехка лазараш хьалххе а гучадахара тӏехьа цахаддаш болх бу
2026 шера лораша, итташ эзараш нах чулоацаш, болх дӏахьоргба, яхаш, дийцар «Сердало» газетага республикан кулгалхочун зарбан болх лелабераша.
«Хьалххе а лазар дий хьожаш, лорашка чакхвалар лоархӏаме да. Из вай республикан унахцӏенон керттера декхар да. Карарча шера профилактика балха юкъевоагӏаш хургва 285 840 саг. Керттера декхар – лазар хьалххе а гучадаккхар, хронически инфекционни доаца лазараш бахьан долаш нах кӏезигагӏа бовргбола хӏама дар. Эггара хьалха из доагӏаш да дега лазараш долча, цӏийоацар, шекар лакха долча наха- дукхагӏа уж бахьанаш да нах бовш хилара, вай республике санна берригача мехка а», - аьлар ГӏР кулгалхочо Келаматанаькъан Махьмуд-ӏаьлас.
Карарча хана мехка болх беш да эшаш мел дола таханарча заман гӏирсаш, кхыдола хьалаш чудола лорий урхалленаш, гаьнарча юрташка бахача наьха а тахан паргӏатта лорашка чакхбала таро я.
Наьха могашал хьалххе а миштай харо, лорий моттигаша мел эша таронаш лелаяро, лорашка чакхвалара хьалаш дика вӏашагӏдехка хиларо бахархой могашала сурт ма дарра гойт, шоай ханнахьа царна дарба ду.
