Гӏалгӏайче дӏахьоргья «Юрт-ганз» яха кагирхой Фестиваль
Кастлуш Гӏалгӏайче дӏайолалуш я «Юрт-ганз» яха юртарча кагирхой Фестиваль. Из лаьрхӏа я къонача ноахалашта къаман мах бараш, культура, ӏадаташ довзийтара, керда чӏоагӏа низ хьакхоллара. Из кхетаче дӏахьош я «Кагирхой, бераш» яхача къаман проекта чуйоагӏаш йола «Моттиго кагирхошта» яха федеральни программа кхоачашъе, яхаш, дийцар «Сердало» газетага республикан кагирхой Комитете.
Фестиваль дӏахьоргья кхаь даькъ тӏа йийкъа. Ардара бетта 21-ча дийнахьа хьаьший тӏаэцаргба Наьсарен кхален Гӏаьзе-Коа, ардара бетта 24-ча дийнахьа Шолжа кхален Гӏажарий-Юрта; юххера а, лайчилла бетта 4-ча дийнахьа Магӏалбик-Шахьаре.
Уж хургда дицлургдоаца кхо ди. Доакъашхошта гургья спортивни яхьаш, говзанча хьехамаш, кхоллама балхаш. Цу даькъ тӏа хургда тематически гойтамаш, ярмаркаш, этнокультуран дакъа, концерта сцена. Хьаьший, фусам-даьй таро хургья даарах чам баккха, иштта лоархӏаме кхоллама кхетаченаш дӏаяхьа, керда бувзамаш хотта.
Цул совгӏа, из болх вӏашагӏбеллараша кийчъяьй дукха яхьаш, цига тайп-тайпарча доакъош тӏа совгӏаташ доахаргда, шоай начӏал гойта таро хургья.
