Байтанч волча Татренаькъан Исроапила кхоллама сайре хургья
Къаман библиотеко дӏахьош йолча «Маьт-лоам» яхача литературан кхоллама оагӏон доакъашхо волча байтанчан Татренаькъан Исроапила кхоллама сайре хургья укх бетта 18-ча дийнахьа. Къаман литературан наькъ тӏа ваьннача къонача байтанчас 35 шу дизара хетаяь я «Байтий курс- поэтагара совгӏат» яха кхетаче.
«ӏаьлий-Юртарча культуран Цӏагӏа дӏахьоргйолча кхетаче бахархошта довзаргда цун «Дагалоацама лараш» яха, иштта кхыдола гулламаш», - дийцар «Сердалога» Къаман библиотеке. Вай къаман литературе керда книжка арадалар литература лоархӏарашта доккха совгӏат да.
Татренаькъан Исроапила цӏи тахан мехка дикка йовзаш я. Россе йоазонхой Союза доакъашхо волаш, хьинаре къахьегаш хьавоагӏарех ва из къаман литературе, иштта «Магас» телеканале «Эздел» яха передача дӏахьош ва из. ООО «Пилигрим» яхача кепайоазон моттиге арахийца да цун керда книжка.
Духхьал байтий гуллам хинна ца ӏеш, Исроапила ший дега хьал довзийташ дола книжка хилар цох, цунна юкъедахад ший декхараш кхоачашдеча наькъ тӏа турпалал гойташ вахар хаьдача ший вешийна Ибрахӏима цо хетадаь йоазош. Редактор я Россе йоазонхой Союза доакъашхо, «Маьтлоам» яхача литературан кхоллама оагӏон кулгалхо йола Коазой ӏашат.
Книжкан хьалхарча оагӏон тӏа, шийна хетар оалаш, цо белгалду Исроапил литературе йизза моттиг дӏалаьца, хьинаре къахьегаш, ший къаман литература дезаш вола байтанча волга.
«Дагалоацама лараш» яхача гулламо къонача байтанчан вахар, цун уйла, нигат довзийтаргда мехкахошта.
