Гӏалгӏай мехка дӏадоладелар ишколал хьалхарча дешара Шу
Вай мехка лаьрххӏа дӏадоладир ишколал хьалхарча дешара Шу. Из хьадийллар «Зӏамига зирак» яхача бер дегӏадоаладара Центре. Цох хилар республикан дерригача дешара даькъ тӏара белгало. Кхетаче дӏахьош дакъа лоацаш хилар дешара, ӏилман министр Цхьорой Ахьмад-Башир, министра гӏонча Угурчанаькъан Паьтӏамат. Иштта цӏай дӏахьош хилар республикан хьалхале лелаеча берий бешамий кулгалхой, берий дай-ноаной.
«Карара шу Россе дешара Министерствос хьакхайкадир ишколал хьалхарча дешара Шу да аьнна. Из лаьрхӏа да зӏамигача берашта луш бола кхетам совбаккхара, уж зӏамига болча хана денз хьалкхедара, иштта массайолча оагӏорахьара хьехархой хьаллацара. Вай республико маьхалдоаккхаш да цу даькъ тӏара болх тоабара дола хьал. Тӏеххьарча шерашка ӏалашо яьй ишколашкара дешар массанега дӏакхоачаш хилийтара, 10 эзар совгӏа дешара моттиг хьакхеллай, массайолча моттигашка дӏахьош да цӏенхаштта тоадара балхаш, из деррига федеральни проекта чудоагӏаш да.
Къаьстта йола терко тӏайохийт хьехархой балха говзал дегӏакхувлара, керда наькъаш юкъедахара, берий даьшцара бувзам чӏоагӏбара», - аьлар «Сердало» газетага республикан дешара, ӏилман Министерствон зарбан болх лелабераша.
Цхьорой Ахьмад-Башира, цига гулбеннача нахаца ше къамаьл деш, белгалдир, деша даха ха йоаца бераш - из сага оамал вӏашагӏйоллара лоархӏаме ха я. Тематически Шу хилар хьакхайкадаь хиларо таро лургья берий бешамашка гӏирсий-технически кӏийле чӏоагӏъе.
Гӏалгӏай мехка ишколе даха ха йоацача берий Шу хьакхайкадаь хилар - из республикан эггара зӏамагӏа, пайдане, дика, укх заман дешар хьакхоллара лоархӏаме гӏа ба. Из доацаш а, ер шу балхаца ювзаенна яхьаш, семинараш, цӏай-кхетаченаш дӏаяхьарах диза хургда.
