«Доттагӏала сердал. Даькъастен гӏалаш» яха ӏX Халкъашта юкъера проект я, вай мехка йоаржаеш
Къамашта юкъера барт, машар хьаллоацаш йола ӏX Халкъашта юкъера проект я, вай мехка йоаржаеш. Къаьстта лоархӏаме болх ба из тахан, ер шу Россе къамий цхьоагӏон Шу да аьнна белгалдаь хиларца.
2026-ча шера «Доттагӏала сердал. Даькъастен гӏалаш» яхача проекта 10 шу дуз. Цу юкъе карагӏдаьннараш, дайзараш кӏезига дац. Россе дахаш долча къамий бӏаьшерашкара денз хьадахьа ӏадаташ, истори, культура йовзаш, гӏо деш хилар доаржадеш, вӏаший бувзам чӏоагӏбеш, доттагӏал тоссаш, къахьийгад къонабараша.
«Проекта керттера декхар тайп-тайпарча къамех бола къонабараш вӏашкаозар да. Дикача, беркатеча гӏулакхашка гӏолла, накъадаргдараш доаржадеш, блогаш лелаеш, Россе дахаш долча къамий истори, гӏулакхаш, культура йовзаш; из никъ дӏахьош ба къонабараш. Магасе гулбеннаб тайп-тайпарча моттигашкара эггара хьинар дола, кадай бола къонабараш. Россе керда моттигаш а я цу юкъе. Из кхетаче лоархӏаме хиларах лаьца къамаьл дир кагирхой гӏулакхех йолча Комитета хьалха латтача Пхьошанаькъан Зоврбика. Цу оагӏон ше хьалха лаьтта ханаш дагаехар цунна; аьттонца, хьинарца дӏачакхбала даькъалабийцар цо къонабараш.
Гӏалгӏайченах шоай йола уйлаш йовзийташ бар гулбеннараш. Вай мехкара ӏалам тамашийна хоза, беркате хеташ; хьаьша тӏаэцар республике къаьстта йоккха моттиг дӏалоацаш долга белгалдеш бар хьаьший», - дийцар «Сердалога» кагирхой гӏулакхех йолча Комитете.
Дукха хӏама довза дезаш ба гулбеннараш дӏахо – гӏо дарцара боламаш доаржадеш, культуран - исторически моттигашка гӏолла гобоаккхаш, вӏаший доттагӏал тоссаш, цхьана, оагӏув хьаллоацаш хиларга цхьаккха хӏама кхоачаргдоацилга дӏагойташ хургба къонабараш.
